المفروزين أمنيا؟؟؟ شكونهم؟؟؟ شبيهم؟؟؟ آش يحبو؟؟؟

صباح الخير الناس الكل

اليوم ثاني نهار في أوّل شهر من عام ألفين وسبعطاش

اليوم ثامن نهار من إضراب عن الطعام يخوضوه أثناش تونسي... هاذوكم هاك اللي يسموهم "المفروزين أمنيا"...اليوم نهار آخر من سلسة سنوات من المقاومة والصمود وإرادة الفعل

بقى انو برشا ناس يقولولي تي شكونهم هاذم المفروزين أمنيا؟؟ وشبيهم؟؟؟ آش يحبو؟؟؟

مش مشكل اننا ما نعرفوش شكونهم المفروزين أمنيا وما نعرفوش حكايتهم... المشكل انو نبقاو سادين وذنينا وعينينا وبالعين السنتنا

مش مشكل انك تتفق مع القضية والا تختلف معاها... المشكل انك ما تمتلكش خيوط الحكاية ومع ذلك تفتي فيها

أشمعناها مفروزين أمنيا؟؟؟  معناها ناس تم فرزهم باعتماد معطيات واردة في تقارير أمنية أو ما يعرف بتقارير أعوان البوليس

 السياسي أو الإرشاد

وشكونهم هاذم المفروزين أمنيا؟؟؟ هاذم نشطاء الاتحاد العام لطلبة تونس واتحاد أصحاب الشهادات المعطلين عن العمل... هاك الناس اللي برشا منكم كانوا يشوفوهم في ساحات المعاهد والجامعات عاملين اجتماعات واضرابات ويطالبو بحقوق الطلبة ويدافعوا زادة على قضايا البلاد والعباد ويعلنو على تمسكهم بكل القضايا العادلة في العالم

وعلاش فرزوهم وكيفاش؟؟؟ فرزوهم خاطر التقارير الأمنية قالت اللي هوما عناصر شغب... اللي هوما ما يحبوش السيستام... اللي هوما خطر على الوعي العام والتفكير الجمعي... واللي هوما كخّة ولازم نعاقبوهم خاطر ما طبلوش... خاطر ما طبّعوش... خاطر ما سكتوش... خاطر ما ركحوش... خاطر ما ساوموش وما باعوش... أمّا كيفاش فرزوهم فهي مسألة ساهلة... التضييق عليهم في قرايتهم... في حياتهم... في أي محاولة باش يخدمو أو يعملو أي نشاط مهني يحفظ كرامتهم... كانوا أصحاب كلمة فعاقبوهم بأن تسحب أسماؤهم من المناظرات... بأن يتم تتبع مشغليهم والضغط عليهم لطردهم... مارسوا عليهم كل أنواع الهرسلة... برشا منهم الطش وصل لعايلاتهم... وبرشا منهم ولاو منفيين في وسط بلادهم في وسط حومهم في وسط الشوارع

أيه وآش عملو كي صار فيهم هكا ما تابوش؟؟؟ على شنوة تحبوهم يتوبو؟؟؟ على حب البلاد؟؟؟ على الإيمان بحلمة مزيانة تقول اللي أحنا مواطنين في وطن فيه واجبات وحقوق؟؟؟ على شنوة تحبوهم يتوبو؟؟؟ على الحق؟؟؟ 

براف... ما عملو شيء... فقط واصلوا ثنيتهم بنفس الثبات بنفس الصمود بنفس الروح والعزيمة ونهارة اللي الشوارع نادات لبوا النداء... انحيازهم للشعب قداسة لا يطالها الشك... همّا الشعب والشعب همّا... عمّروا الشوارع والساحات... وحناجرهم صدحت  بالحق وبالحلم... حتى اللي تعب منهم وبدا اليأس والمرض يحاصرو فيه عمل من الضعف قوة وقام وخرج وقال البلاد تستحقني

واصلوا ثنيتهم وما ثماش محطة عرفتها البلاد وماكانوش حاضرين فيها بقوة... خبرتهم في التنظم في التأطير قدموها للجماهير الغاضبة وما خلاوش البلاد وحدها

أي ومن بعد آش صار؟؟؟ من بعد ما صار شيء... اللي في الأبعاد رجعو وبداو يقسمو في البلاد.. واللي كلاو الخبط وعانوا القمع قالولهم برا روح راك مفروز... يزيك ويعطيك الصحة... أما ها البلاد مش بلادك... وما عندكش فيها حق..

.

وسكتوا؟؟؟ وقبلوا؟؟؟ لا ما سكتوش وما قبلوش... تنادوا من الجيهات الكل وبداو يتفاوضو مع الحكومة وحكومة تطيش الملف لحكومة وحكومة ما تستعرفش بخدمة حكومة ووزير يقول ما في باليش ووزير يقول لا نقصولي ووزير يقول لا ما نعرفوكمش.. ورجعوا المفرزوين للشوارع ورجع البوليس يهرسل ويضرب.. ورجعت الحكومة مولى الدار مش هوني... واليوم ثمة أضراب عن الطعام... اضراب ماهواش الأول... والكلنا لازمنا نتكاتفو باش يكون الأخر... وقيت الناس الكل تقول "يزّي من الجوع" ... "يزّي من الفرز" وقيت المواقف تكون واضحة وصريحة... المفروزين قبل سامحو الناس الكل اللي خلاوهم وحدهم وقالوا عصا القمع كانت مسكتتهم اليوم ما ثماش مبرر للسكات... اليوم السكات عار... السكات جريمة في حق المفروزين أمنيا وحق المفروزين اجتماعيا وحق المفروزين يوميا لسبب أو آخر

أيه وآش يحبو المفروزين توا؟؟ المفروزين بعد اضراب الجوع تاع العام اللي فات صححو اتفاق مع حكومة الصيد يتسمى اتفاق  ثمنطاش جانفي... الاتفاق هذا يقضي بتشغيل المفروزين أمنيا بعد المرور بجلسات استماع فردية ياخي يجي الطرف الحكومي ويسمع قائمة ويخلي القائمة التكميلية ومن بعد يزيدو في القائمة اللي سمعوها طاحوا يعملو في فرز فوق الفرز وبالتالي المفروزين أمنيا من اللي كانوا يطالبو بحقهم في العمل اللي تحرمو منو بسبب الفرز الأمني يلقاو أرواحهم اليوم يواجهو في فرز مضاعف... وبالتالي مرة أخرى رجعوا للشوارع والساحات ومرة أخرى مجموعة منهم تقرر خوض اضراب عن الطعام لرفض التجويع الحكومي لنشطاء الاتحادين...اليوم الاضراب في نهارو الثامن... وتوا مقرّ الاضراب محاصر بالبوليس... فماذا أنت فاعل يا سائلي/

قارئ؟؟؟

شنوة نجم نعمل أنا؟؟؟ ساهل برشا... تنجم تبرطاجي المقال هذا أو أي خبر يتعلق بالمفروزين أمنيا... تنجم تكتب مراسلة توجهها لرئاسة الحكومة تقلها شغّل المفروزـ طبّق الاتفاق ـ حق المفروز واجب... تنجم تساند تحركات المفروزين في الشارع... تنجم تحكي 

عليهم في وسائل الاتصال الاجتماعي... تنجم تقول لا للظلم... لا للفرز... لا للتجويع الحكومي

رفيقة منتصري